حضرت عبیداللہ بن عدی انصاری ؓ کی حدیثیں
حضرت عبیداللہ بن عدی ایک انصاری صحابی ؓ سے نقل کرتے ہیں کہ وہ نبی کریم ﷺ کی خدمت میں حاضر ہوئے اور سرگوشی میں نبی کریم ﷺ سے ایک منافق آدمی کو قتل کرنے کی اجازت مانگی نبی کریم ﷺ نے اونچی آواز سے پوچھا کیا وہ لا الہ الا اللہ کی گواہی نہیں دیتا؟ انہوں نے عرض کیا کیوں نہیں یا رسول اللہ! ﷺ لیکن وہ دل سے گواہی نہیں دیتا نبی کریم ﷺ نے پوچھا کیا وہ اس بات کی گواہی نہیں دیتا کہ محمد ﷺ اللہ کے رسول ہیں؟ انہوں نے عرض کیا کیوں نہیں یا رسول اللہ! ﷺ لیکن وہ دل سے گواہی نہیں دیتا نبی کریم ﷺ نے پوچھا کیا وہ نماز نہیں پڑھتا؟ انہوں نے عرض کیا کیوں نہیں یا رسول اللہ! ﷺ لیکن وہ دل سے نماز نہیں پڑھتا نبی کریم ﷺ نے فرمایا اللہ نے مجھے ان لوگوں کو قتل کرنے سے منع فرمایا ہے۔ گذشتہ حدیث اس دوسری سند سے بھی مروی ہے۔